• ව්‍යාපාරික ආයතනයක් ලෙස වාණිජ බැංකුවක් ප්‍රධාන වශයෙන් අරමුණු 2 ක් අපේක්ෂා කරයි
1.මහජන විශ්වාසය දිනාගැනීම.
මහජන විශ්වාසය දිනාගැනීමට වාණිජ බැංකුවකට තම ගනුදෙනුකරුවන් තැන්පත් කරන ලද මුදල් නැවත ඉල්ලුම් කරන විට ලබාදීමට හැකි විය යුතුයි. මේ නිසා එලෙස ගනුදෙනුකරුවන/ගිනුම් හිමියන් ඉල්ලූ විට ගෙවීමට කිසියම් මුදලක් වාණිජ බැංකු තමා සතුව තබා ගනී.මෙලෙස රඳවාගත යුතු ප්‍රමාණය ප්‍රතිශතයක් ලෙස ශ්‍රී ලංකා මහ බැංකුව ප්‍රකාශයට පත් කරයි.එම ප්‍රතිශතක ප්‍රමාණය ව්‍යවස්ථාපිත සංචිත අනුපාතය ලෙස හඳුන්වයි.
2.ලාභදායිත්වය.
ව්‍යාපාරික ආයතනයක් ලෙස වාණිජ බැංකුවක් ලාභයක් අපේක්ෂා කරයි. මේ නිසා වාණිජ බැංකු තම තැන්පතු වලින් සංචිත අනුපාතය රඳවා ගෙන, ඉතිරි මුදල ණය ලෙස ණය ඉල්ලුම් කරුවන්ට ලබා දේ. එසේම තවත් කොටසක් වෙනත් විකල්ප ආයෝජන වල යොදවයි. එලෙස ණයට ලබාදුන් මුදල් වල ණය පොලියත්, සෙසු ආයෝජන වලින් ලබන ආදායම් මඟින් ලාභ උපයයි. එලෙස ලබන පොලී ඇතුලු විවිධ ආදායම් වලින් ලබන මුදලින් තම තැන්පතුකරුවන්ට, තැන්පතු පොලී ගෙවයි.
• ඒ අනුව වාණිජ බැංකු වලට තැන්පතුකරුවන්ගේ තැන්පතු වගකීමක් වේ. (නැවත ගෙවිය යුතු නිසා)එසේම එම තැන්පතු මුදල් වලින් ලබාදෙන ණය සිය වත්කම් ලෙස හඳුනාගනී.(නැවත අය විය යුතු නිසා) එලෙස වාණිජ බැංකුවක පවත්නා වගකීම් හා වත්කම් පහත පරිදි ශේෂ පත්‍රයක් තුල දැක්විය හැකියි.
ශේෂ පත්‍රය
*කිසියම් මූල්‍ය ආයතනයක, දෙන ලද නිශ්චිත අවස්ථාවකදී එහි පවතින මූල්‍ය තත්වය පෙන්වන ගිණුම් සටහනක් ශේෂ පත්‍රයක් වේ.
*ශේෂ පත්‍රයක් වත්කම් හා වගකීම් ලෙස පැතිකඩ දෙකකින් සමන්විතයි. මේ නිසා මෙවැනි ශේෂ පත්‍රයක වම් පස වගකීම් පැතිකඩත්, දකුණු පස වත්කම් පැතිකඩ ත් දක්වයි.
• ඉහත සාකච්ඡා කල ආකාරයට වාණිජ බැංකු ලාභදායිත්වය සහ මහජන විශ්වාසය රැක ගැනීමට පහත පරිදි තම වත්කම් කළමනාකරණය කරගනී.
# මහජන විශ්වාසය දිනාගැනීම - එනම් ඉල්ලූ විට ගෙවීමට ද්‍රවශීල වත්කම් ගොනුවක් පවත්වා ගනී
# ලාභදායිත්වය - ලාභ ලැබීමට හෙවත් ආයෝජනයට අද්‍රවශීල වත්කම් ගොනුවක් තබාගනී.
• වාණිජ බැංකුවක පැවැත්ම රඳා පවතින්නේ මහජන විශ්වාසය මෙන්ම, ආයතනයේ ලාභදායිත්වය මතයි. මේ නිසා වාණිජ බැංකුවක දිගු කාලීන පැවැත්මකට ඉහත අරමුණු සාක්ෂාත් වන පරිදි තම වත්කම් ගොනුව නිසි ලෙස කළමනාකරණය කල යුතු වේ.
මීළඟ ලිපියෙන් හමුවෙමු!
No comments:
Post a Comment